Ul mercaa da Lügan

 In Senza categoria

In memoria della Signora Irene di Brè

Ul mercaa da Lügan 

‘N duva l’è quel bel mercaa?

L’era chi, sü quescta piazza!

Chi ca l’è che l’ha spusctaa ?

Quai pulitich, da gran razza.

 

Da sicür con buoni intenti;

par lassà püssée da posct

al gran palco degli eventi.

Par i fesct da lüi e agosct!

 

Show, cun spot e altuparlant,

lüminari scperlüsent,

cun ul gezz e i so cantant,

fesct, cuncert, divertiment!

 

E ‘l mercàa, la tradizion?

L’ han scpusctat in Via Canova,

una növa übicazion.

Pal mument: solo per prova !

 

Par furtüna gh’è ancamò

i do fil da bancarell

e quaidün che vend dal so;

che par nüm l’è lì ‘l so bell.

 

Lard, lüganigh, salamin;

robb che fa la gent cuntenta.

L’övett fresch, ul furmagin

e la feta da pulenta.

 

Mangià san, da quel d’un temp

che fa ben e dà scperanza,

che ralenta ‘l muviment

del moderno che s’avanza.

 

A sem nüm cul cò d’argent

che gh’em sempar quel cioo fiss

da pensà che forse un temp

l’era püssée bel che adess.

Sciura Irene ‘n duva l’è ?

Cul scussaa e ‘l fulard in tescta

in via Nassa, lì dadré;

a incuntrala l’era fescta .

 

Roba fresca genüina:

insalata, erbett e i fiuu.

Cataa propi sctamatina

e ‘l sa sent fin chi l’uduu.

 

Quanti volt sü e giò da Brè

par i sciuri da Lügan.

La sua gerla sü dadré,

la fadiga ammò ‘n di man.

 

Quel tocch d’ort cüraa cun pena

e fadiga che ta lassa

quela cürva nala schena.

Maa da tera, sempar bassa.

Un banchett da puesia,

bancarela un puu butich:

fiuu, verdür e curtesia.

Na vedrina cun quel zich

 

da quel Munt purtaa in città

par la gent cun poch pretes,

par fagh viv e rescpirà

l’aria bona dal Paes.

 

Sciura Irene, sempar bela,

passa ‘l temp e passa i ann.

Pensi a lée ala bancarella

in Via Nassa chi a Lügan.

INFO

Introduzione

Autore: Silvano Montanaro


Post suggeriti
Contattaci

Hai suggerimenti, materiali, o vuoi semplicemente dire la tua! contattaci

Inizia a digitare e premi Enter per effettuare una ricerca

Testo +
Contrasto